پرانا پاکستان بمقابلہ نیا پاکستان

کچھ لوگوں کا کہنا ہے کہ قائد اعظم نے پاکستان ٹھیک سے نہیں بنایا تھا، اسلئے اب نیا پاکستان بنایا جائے گا۔  یہ بیان سن کر وہ لوگ کہ جن کے گھر کی چھت ٹپکتی ہے یا پلستر اکھڑ گیا ہے یا فرش ہموار نہیں بنا ہوا ہے، یہ سوچ کر ساتھ ہو لئے ہیں کہ ضرور قائد اعظم کی ہی غلطی ہے جو پاکستان ٹھیک سے نہیں بنا کر گئے ۔ جب نیا پاکستان بن رہا ہے تو وہ کیوں نا مستفید ہوں۔

سو نقشے کی منظوری کے لئے سب بھائی بندو نکل کھڑے ہوئے ہیں ۔ اس بات سے کچھ ایسے لوگوں کو بہت تکلیف ہے جنھوں نے ملک کو مقررہ مدت تک لیز پر لے رکھا ہے اور بمع اھل و عیال ڈ نٹر پیلتے پھرتے ہیں۔ سو ان کی ہمایت میں وہ 

 "تمام لوگ موجود ہیں جن کا کہنا ہے کہ "ابا جی سانو وڈا کمرہ دے گئے سی۔ اسی خوش آں"

اب حال یہ ہے کہ دونوں جماعتیں آپس میں گتھم گتھا ہیں بلکہ یہ کہنا صحیح ہو گا کہ نقظہ نظر پیش کرنے والے اپنے کمروں

 میں سکون فرما رہے ہیں اور ان کے حمایتی لڑ لڑ کے شدائی ہو رہے ہیں۔ جہاں لڑائی ذرا ٹھنڈی پڑنے لگتی ہے "محلے کی پھپھی" نما لوگ رولا ڈال دیتے ہیں " وے میں آ گئی آں ۔۔۔ روک لو مینو۔۔۔۔ ووے ہے ہمت تے پھڑ لو مینوں۔ یہ کہنے کی دیر ہوتی ہے تو سارے چٹے بتے پھر متحرک ہو جاتے ہیں۔

ایسا گمان ہو رہا ہے جیسے دو بھائی ترکے میں ملے مشترکہ گھر کے لئے آپس میں دست و گریباں ہو رہے ہیں مگر ایسا کرتے ہوئے یہ بھول گئے ہیں کہ تماشہ پورا محلہ دیکھ رہا ہے اور اس لڑائی کو دیکھ کر شریکوں کے دل میں ٹھنڈک پڑ رہی ہے- ایسی ہی لڑائیوں کی وجہ سے پہلے بھی یہ گھر بٹا تھا اور بیچ میں دیوار بنا کر ایک بھائی الگ ہو گیا تھا ۔

دعا ہے کہ یہ بھائی ہوش کے ناخن لیں اور مل کے اس گھر کو چلائیں ۔ کیوں کہ یہ گھر ہے  تو پہچان ہے، عزت ہے، بے گھروں کو دنیا خیرات تو دے دیتی ہے پناہ نہیں۔